中環出更：陳南祿冷馬威過田少熱駒
梁營喺特首選戰中大勝唐營，估唔到兩營嘅運勢延續到尋日嘅沙田馬場賽事。話說恒隆集團董事總經理陳南祿（Philip）有份嘅團體馬「萬寶駒」，以二十七倍賠率爆冷跑出，勢不可當。反觀另一場賽事，提名唐英年選特首嘅自由黨榮譽主席田北俊嘅駿駒「閃爍武士」就大熱倒灶，認真唔夠運。
瓜分38萬元獎金
「萬寶駒」起跑之初，Philip正與卓妮大談旅行趣事，點知講講吓發覺愛駒愈戰愈勇，最後仲勇奪冠軍。愛駒首次奪冠，Philip與馬會副主席葉錫安、大董李家祥（Eric）等馬主都喜出望外，瓜分約三十八萬元獎金。
Philip話，日前同太太去咗以色列耶路撒冷度假九日，大呼過癮，皆因佢係虔誠天主教徒，聖經就睇得多，但聖地就係第一次去，見盡各教派服飾。可惜咁啱遇上逾越節，禁食發酵食品，無啤酒飲又無麵包食，惟有餐餐食猶太聖餅「Matzo」加煎蛋當飯，變相修身。
至於Eric亦計劃下月去秘魯、哥倫比亞及委內瑞拉尋幽探秘，之後飛去巴黎出席銀行業界會議，再由巴黎返港，行程約三星期，非常緊湊。
卓妮