中環出更：候任特首夫人 自得其樂
候任特首梁振英（CY）係出咗名嘅工作狂，無乜時間陪太太唐青儀一啲都唔奇，梁太自然識得搵節目娛己。卓妮前日下午四點幾鐘就遇到啱啱「血拼」完嘅梁太，同一位女友人喺中環置地廣場一間餐廳歎下午茶，佢哋坐嘅位置唔係喺主要通道，所以比較安靜，最啱密斟，結果兩人雞啄唔斷傾咗個半鐘，直到五點幾鐘先至離開。梁太同友人喺置地地下道別，之後就等CY嘅「AM 66」專車嚟接佢。當時落緊大雨，梁太拎住嘅部分戰利品都包咗膠袋。卓妮上前同梁太打招呼，佢就以微笑回應，但問到佢有心理準備做特首夫人未，同埋會否入住禮賓府時，佢就無回應喇。最後梁太喺酒店等咗十分鐘左右，司機先至到嚟接佢走。
CY帶太太鋸扒撐枱腳
雖然話CY忙於籌備新政府，但佢都無冷落太太，尋晚特登叫司機接梁太去候任辦，然後兩公婆一齊到大角咀塘尾道重開嘅老字號「美而廉餐廳」撐枱腳。原來咁啱尋日係餐廳搬遷後重新開張，CY同梁太抵達餐廳時已經有成廿人排緊隊輪候，最後佢哋搵咗個卡位坐低。唔少食客見到CY夫婦，都好熱情同佢哋合照留念。
CY同梁太叫咗個鐵板扒餐、蛋白炒飯同兩杯飲品，盛惠一百二十八蚊。老闆本來話請CY，但CY就耍手擰頭，最後仲畀咗一百四十蚊唔使找，真係同貪小便宜嘅煲呔曾差天共地。
卓妮