單車老鼠專偷貴價貨 運內地銷贓
【專案組報道】貴價單車有價有市，單車老鼠睇準機會落手，以往車主還可以於本地單車零件網站中，找回愛驅屍骸。但隨着人民幣升值及內地需求日增，被偷單車隨時落入內地黑市單車市場，甚至被人化整為零，分散於各省市出售，尋回的機會渺茫。
「近排好多畀人偷嘅都係專業單車，唔係公路車就係爬山單車。」知情人士估計，單車老鼠對單車頗有認識，而專揀一些高質素的單車落手，對賊贓出貨方法，亦瞭如指掌。
「早上偷，下午賣」
隨着內地單車發燒友愈來愈多，賊贓單車已出現北移迹象。「其實運一架半架車返內地真係話都無咁易，推過境話係返內地玩，一般都無乜問題，賣畀啲單車舖，利潤高過香港唔少。」
記者到深圳一個位於洪湖立交橋一條隧道的黑市單車市場，每日下午五時起，陸續聚集起一批人，他們每人停泊一至兩部單車擺賣。在二十多部等售單車中，大部分均屬平價款式，不過當中亦夾雜一兩部名貴的Fixed Gear無煞掣單車，索價僅數百元至一千元人民幣。記者聲稱希望找一部高級公路車，對方即說：「呢啲貨好少，咁啱撞到咪有囉！」
據知情人士透露，這些單車大多是「早上偷，下午賣」的賊贓，雖然大部分是平貨，不過偶有小量靚貨出售，故此吸引不少單車「買手」執平貨，再轉售至廣東省其他地方。