執法遲大到 警縱容違泊
警方執法「遲到」，變相縱容車輛違泊！於堅尼地城工作的許先生指出，一間位於加惠民道的學校，每日放學時段校外皆有大量車輛違例停泊，「幾十架車泊晒喺行人路，有時仲雙線咁泊，實在太離譜！」許指違泊問題危害居民安全，「呢度再上啲就係西環邨，好多老人家出入，陣間塞住救護車上去救人就大件事！」
警方發言人稱，上址於放學時段較多車輛短暫停留，已經常派員進行交通管制，以便市民接送學童。發言人續稱，去年共接獲五十五宗相關投訴，共向違泊車輛發出逾二百一十張定額罰款通知書。
「泊喺度個幾兩個鐘都叫做短暫？有冇搞錯？」許先生對於警方回覆感到極不滿，又指曾多次投訴，惟警方每次皆姍姍來遲，質疑警方輕視問題嚴重性，「次次收到投訴之後成半個鐘後先到，乜車都走晒啦！」