官場係人都知，「特貪之首」曾蔭權唔止貪，仲好要面，發夢都想名留青史。嗱，佢終於恨到嘞，自從爆出連串貪腐醜聞之後，極速創下三項歷史性「第一」。
呢三項第一就係，香港歷任港督同特首之中，佢係第一個被廉署調查、第一個被立法會提出不信任動議、第一個被立法會彈劾。真係前無古人，後無來者，就算唔名留青史，都必定可以遺臭萬年嘞啩！
話時話，煲呔曾呢三項第一，全部值得寫入史冊，事關貪腐特首唔係人人都可以做到㗎。首先，要夠無恥，日日傍住富豪黐飲黐食；其次，要夠無賴，人贓並獲斷正，仲要話係市民對官員嘅期望提高咗；然後，就係要有一班專職保皇護貪嘅立法會議員嘞！
點解咁講？咁就要講番煲呔曾嘅其中一項「第一」喇。煲呔曾被本報踢爆連串貪腐醜聞之後，全城怒轟，倒曾浪潮一浪接一浪，立法會議員破天荒向佢提出不信任動議。特首貪腐喎，「曾商勾結」喎，利益輸送喎，議員作為民意代表，係咪應該主持正義對動議投贊成票先？點知嗰班保皇議員居然是非不分，全力護航，結果動議被否決，真係講都冇人信！
立法會嘅天職係監察港府、制衡行政，「特貪之首」貪遍省港澳、歎盡海陸空，人贓並獲，鐵證如山，居然可以避過不信任動議嘅鞭撻，問你服未。唔怪得車公靈籤話，「何為邪鬼何為神，神鬼如何兩不分」，家陣行政、立法沆瀣一氣，人鬼不分，香港有乜辦法唔烏煙瘴氣吖？
不過咁，人在做，天在看，煲呔曾咪開心住呀，你避得過議會鞭撻，避唔過正義審判。嗱，不信任動議雖然被否決，唔代表你已經過咗骨，事關仲有一個彈劾議案等緊你，退一步講，就算彈劾議案最終又被否決，仲有廉署嘅調查，無論如何，貪曾都肯定身敗名裂嘅喇！
講開又講，一個貪腐特首，一班保皇議員，真係絕配。經此一役，煲呔曾臭名昭著，保皇黨作為護貪死士，梗係要付出政治代價。九月立法會選舉換屆，各位選民擦亮眼睛，認住呢班是非不分、包庇貪曾嘅保皇議員呀，如果唔想香港再有貪腐特首，大家就要用手中嘅選票趕走呢班「曾小人」！
嗱嗱嗱，煲呔曾貪腐瀆職，立法會自廢武功，廉署查貪曾更加不容有失。正如北大人話齋，為政要清廉吖嘛，廉潔係香港嘅核心價值，更加係社會穩定嘅基石，家陣被一個貪曾搞到晚節不保，廉署呢鋪一定要打大老虎，重建廉政，如果唔係，「香港好彩有ICAC」嘅宣傳口號唔該自動消失！
煲呔曾話喎，六月三十日前佢話事，我哋不妨放長雙眼，睇吓佢可以橫行到幾時！