立法會飲食界功能組別議席向來都係自由黨嘅橋頭堡，前黨副主席張宇人（Tommy）多年來都輕鬆連任，但九月選舉將面臨兩面夾擊。
有消息話，挺梁嘅餐飲聯業協會會長黃家和同民建聯大埔區議員鄭俊平都磨拳擦掌想同Tommy「拗手瓜」，其中後者仲提早落區熱身，下周二率先召集各界友好做選民登記，擺出一副志在必得嘅戰鬥格。
不過，Tommy多年來喺業界好穩陣，好似去年底嘅特首選舉委員會選舉推薦嘅十七人名單全數勝出，要挑戰佢絕非易事。有銳意打破Tommy壟斷飲食界嘅政界中人就獻計話，黃家和同鄭俊平各自有一定實力，倘二人經協調後聯手出擊，或會收到意想不到嘅效果喎，唔知黃、鄭二人係咪會認真考慮吓呢個建議呢？
另外，自由黨最近特別多新聞，好似政界有傳該黨司庫李子良同常委丁午壽有意退黨。不過，李子良尋日強調「絕無退黨之意」，而丁午壽亦發表聲明話，自己同自由黨關係良好，絕無諗過退出該黨同動搖過對黨嘅支持喎。