政情：鄺勵齡憑靚聲 揚威奧地利
香港一名廿四歲美女，憑一把靚聲揚威世界。女高音鄺勵齡，周二喺奧地利格拉茲贏得本屆「泰利亞雲尼國際歌劇大賽」，仲一口氣奪得三個獎項，包括「觀眾獎」、為紀念女高音歌唱家修德蘭而設嘅「最佳女高音獎」，以及全場亞軍，捧走六千歐元（約六萬多港元）獎金。佢係十八年來，首位獲獎嘅香港歌手，亦係決賽中最年輕嘅參賽者。
獲獎勉勵母校師妹
一鳴驚人後，勵齡不忘多謝父母、聲樂老師陳少君及香港兒童合唱團，佢又勉勵母校庇利羅士女子中學嘅師妹，要好好學唱歌。原來勵齡自細愛唱歌，九歲加入香港兒童合唱團，多次隨團到澳洲、歐洲及韓國等地演出。大個女後，更考入中大音樂系，現於荷蘭阿姆斯特丹音樂學院修讀碩士，今年夏天就畢業喇。勵齡話希望將來向歌劇方面發展，咁有大志，前途無可限量。