有「離岸特首」稱號嘅煲呔曾，早前耗用巨額公帑遠赴新西蘭同南美外訪十多日，玩到樂而忘返，放軟晒手腳無做政府換屆嘅交接工作，結果被各界狠批。話口未完，煲呔曾個「沙煲兄弟」鬍鬚曾又有樣學樣，趁任期尾執包袱在即，由明日開始嘥公帑到東南亞三國外訪一星期，認真離晒大譜。
政府新聞處尋日下午發稿，話鬍鬚曾會喺明日起至廿八日，先後出訪越南、馬來西亞和泰國，期間指定動作係會晤當地高層官員，出席貿易發展局舉行嘅午餐會，又會同馬來西亞政府簽署全面性避免雙重徵稅協定，以及喺泰國曼谷主持香港電影節首映禮等。
大家咪以為鬍鬚曾出訪東南亞三個國家較為經濟實惠，但講到尾呢啲始終係公帑，一分一毫都要用得其所，再者佢開口埋口提升香港金融中心競爭力，同其他國家簽署避免雙重徵稅協定呢啲工作一早就要做啦，但佢由○七年上任拖到依家先去做，話佢唔係借外訪去旅遊都無人信啦！