政情：發叔妥協 保行會席位

發叔尋日話，尊重法律規定，承認有村民已經向政府登記村屋僭建物，又話唔使咁急，最遲九月三十日先到期喎，立場有啲軟化。事實上，佢早幾日出席立法會會議時，突然透露萌生退意，有意嚟緊九月將自己鄉議局功能界別議席讓出，畀其他人接棒。雖然發叔話想退，但大家都無乜為意，不過有鄉議局中人話，發叔今次未必係吹水，真係有可能讓位畀副主席張學明喎。

張學明戰新東被逼退

早前盛傳張學明九月會由新界西轉戰新界東參選，仲會挾住新界社團聯會榮譽會長個聲勢搶票，本來已經萬事俱備，除咗喺新界東部分地區懸掛宣傳橫額外，佢本人亦已經開始拉票。好可惜，呢個如意算盤已被西環之手推冧，張學明要讓路畀嫁入公民力量嘅沙田區議員龐愛蘭出選，近日仲已經四出放風話自己唔會參選。

另一方面，由於張學明被西環逼退，都算係為大局而犧牲，據聞發叔打蛇隨棍上，建議將自己個鄉議局功能組別議席留畀張學明。不過，發叔肯讓出議席又點會無條件吖，消息人士話，發叔已經向西環表達留任行會嘅意願，據稱反應尚算正面，目前仍積極協調當中。

所謂「鳳凰無寶不落」，發叔喺政壇咁多年，點會唔識乜嘢叫做「妥協」吖，加上新界人重視名譽同地位，發叔積極爭取留任行會可以理解。不過，發叔本身亦麻煩多多，之前發生過漏報利益醜聞，近日又因為喺僭建風暴上同政府唱反調、打對台，搞到畀班泛民主派議員叫佢退出行會，究竟發叔係咪仲適合做行會成員，相信自有公論。