中環出更：尋找接班人 阿Paul「心儀」羅詠詩
香港青年聯會賢慧社主席羅詠詩（Anthea）同七位姊妹，尋日接受旅遊界立法會議員謝偉俊（Paul）邀請參觀立法會新大樓，順道去宴會廳食晏。點知當大家差唔多飲飽食醉時，阿Paul突然透露，佢嚟緊九月立法會選舉出戰九龍東已成定局，仲叫Anthea接棒做立法會旅遊界議員，而Anthea話會認真考慮吓喎！
午宴上，阿Paul大讚Anthea做事既勤力又上心，仲話如果Anthea決定參選，佢一定會全力協助，暗示會將自己嘅旅遊界票源過畀Anthea。
八靚女立會午膳成焦點
卓妮曾經講過，Anthea正全力幫爸爸經營精品酒店，好似油麻地間「Ｍ酒店」就係佢嘅傑作，稱得上係旅遊界嘅生力軍。不過，Anthea就話要認真考慮，家庭係其中一個重要考慮因素。如果佢願意接棒，相信會多一位靚女議員。
一班靚女參觀立法會，大讚議事廳又大又靚，而佢哋共進午膳時，更一度成為宴會廳嘅焦點，會計界陳茂波、資訊科技界譚偉豪等議員紛紛行到宴會廳同多位靚女寒暄，仲大讚阿Paul有福氣，搞到阿Paul全程笑到唔停口。
近日「盛女」成為全城熱話，尋日大家都有討論呢個話題，一眾靚女大彈有關電視節目向女性灌輸錯誤意識，Anthea仲建議賢慧社舉辦講座，分享結婚唔一定係女性嘅唯一出路，單身一樣可以好開心嘅。
卓妮