搬就業中心 玩殘搵工族

「我做散工嘅成日都要嚟勞工處搵工，以前我哋都係嘈咗好耐，佢（勞工處）先肯喺呢度開（元朗就業中心），點知咁快又話要搬，真係好唔方便！」黃先生指平日幾乎每隔數天便會到訪元朗就業中心，自中心於去年十二月遷往天水圍後，即因地點不便而甚少前往。

靠空缺搜尋機易失機會

事實上，元朗就業中心開業僅五年，搬遷後舊址僅貼出告示，着求職者前往天水圍天晴邨勞工處「就業一站」。記者按指示乘輕鐵前往，發現兩址車程需時四十多分鐘，來回車資亦逾八元。記者於新址隨機訪問十名求職者，只有凌小姐一人為元朗居民，「過嚟呢度時間耐都唔緊要，但係要搭車，車錢又貴，下次真係要諗過先嚟！」凌坦言乃首次前往新址，直指額外車資對失業人士構成負擔。

鄺俊宇（左）指元朗市現僅餘數部職位空缺搜尋機，未能滿足求職者需要。

乘輕鐵由元朗就業中心前往位於天水圍天晴邨「就業一站」，需時逾四十分鐘。

勞工處發言人解釋，新設立「就業一站」乃為加強元朗區就業服務，新址面積較舊有中心大三倍，有更多資源及設備向求職者提供更佳就業支援，現每天均錄得一百多人到訪，人數與舊有中心相若。發言人又稱，「就業一站」鄰近天悅輕鐵站，強調元朗市居民若未能親自到訪，亦可透過位於元朗社會福利署辦事處或民政事務處的「空缺搜尋終端機」使用服務。

「有好多地盤散工可能連電腦都唔識用，你叫佢哋點樣用部機（空缺搜尋終端機）搵工？」選區為元朗就業中心舊址的元朗區區議員蕭浪鳴直言近日接獲大量投訴，「新嗰度咁唔方便，好多都係急住搵工先焗住去，新中心根本冇可能代替元朗區本來嗰間就業中心！」

未獲諮詢 議員促交代

元朗區區議員鄺俊宇更稱，勞工處從未就遷移就業中心一事諮詢元朗區區議會，「佢哋解釋，話因為上年十二月搬嗰陣區議會啱啱換屆休緊會；乜原來影響咁多人嘅事可以完全唔使交代？」鄺不滿勞工處以換屆休會作藉口，未於規劃時作廣泛諮詢，直言稍後將於區議會會議上要求當局交代事件，並促勞工處盡快於區內重新設立就業中心。

記者：林松澧　攝影：楊育輝