建制派同商界近日大吹「大和解」風，有傳候任特首梁振英（CY）不計前嫌，物色對手唐營支持者入政府，其中一個係香港工商專業聯會主席黃友嘉（David）。David尋日喺電台節目中，竟然引用CY嘅名句「方方面面」，話一個相對工資中位數較高嘅最低工資，可能會對整體經濟結構帶來「方方面面」嘅影響，確係同CY同聲同氣。
「方方面面」呢幾個字係CY過去接受訪問時經常用到嘅詞彙，聽得多CY講說話嘅人，一般都會記得，至於點解唔用「各方面」來代替，咁就不得而知喇。
David又喺節目中力陳最低工資對商界嘅利害，論點其實唔算新，總之係話最低工資的確好似提高晒低收入勞工嘅收入，但實施最低工資時，香港經濟暢旺，未能充分反映對邊緣勞工嘅就業影響，希望大家唔好掉以輕心咁話。