青協尋日搞咗個英文演講比賽，教育局副局長陳維安（Kenneth）都有去湊熱鬧，佢話以前喺一間重視雙語教學嘅學校讀書，暗示自己中英文都好掂，但點知佢出席比賽後就隨即喺社交網站facebook（fb）露底出醜。Kenneth話個比賽已經「完」滿結束，又分享一位老師教學生演說要有嘅三大「原」素。留言一出，即被網民質疑佢係學生中文水準低落嘅元兇。
有網民更正話，係「圓滿」，唔係「完滿」；係「元素」，唔係「原素」，批評Kenneth賺幾十萬元人工管教育，好應該以身作則，就算搵人管理fb都要搵個有水準嘅，如果咁都管唔好，點管教育呢？既然出醜人前，Kenneth隨即回應：「多謝指教！」並將貼出更正版。Kenneth肯公開受教及更正錯誤，都算係勇氣嘅表現，好過其他高官有錯都當無事發生吖！