政情：翟紹唐辯論靠食腦
尋日有電台喺尖沙咀舉行大專辯論決賽，兩位有傳會出任下屆律政司司長嘅港區人大代表廖長江同「法律界公職王」翟紹唐，都有出席擔任評判，但兩人把口仲密過密實袋，唔肯透露會否加入下屆政府新班子。
翟紹唐喺頒獎時透露，原來今次比賽嘅另一評判、現任大律師公會副主席石永泰，喺一九八三年做過辯論隊隊員。佢憶述當年電腦仲未普及，辯論內容全靠「食腦」同參考書籍，所以要鬥多論點，依家啲同學一上網就咩資料都可以搵得到，反而可能因為資料數據太多而忽略咗論點，失卻咗辯論本身嘅趣味性，叮囑各位同學試吓脫離數據去辯論喎。
講番今次個比賽，辯論主題係「自由行對香港利多於弊」，正方為浸會大學，對戰反方理工大學。近年中港矛盾問題咁敏感，大家當然拗到面紅耳赤，尤其講到雙非孕婦來港爭床位，更加句句到肉。反方同學話，依家床位有錢都買唔到，香港女士如果知道自己有咗，第一時間唔係通知父母，而係要打畀私家醫院訂床位，否則可能隨時連走廊都冇得瞓！比賽最後由反方嘅理大勝出。