政情：民記硬銷籮底橙
候任特首梁振英（CY）近日陸續約見各黨派進行「大和解」工程，尋日佢就應邀出席民建聯路向營，期間談及籌組下屆政府管治班子嘅條件，立即引到班民建聯黨員流晒口水。有民建聯高層仲引用公認表現拙劣嘅商務及經濟發展局局長蘇錦樑（Greg蘇）做例子，賣花讚花香咁話該黨人才濟濟。雖則該黨近一百五十票喺特首選舉中全投CY，但要人硬啃佢哋黨內嘅「籮底橙」，都真係有啲過分囉！
民建聯尋日喺深圳麒麟山莊搞咗個兩日一夜路向營，CY一到，路向營就忽然變身見工大會。CY喺會上提到自己對下屆問責團隊嘅要求，包括要有承擔、有理念、同政府意向一致，仲要有較高嘅政治同行政工作能力，歡迎各政黨向佢推薦人才。此話一出，立即令在坐約二百名黨員兩眼發光，相信係覺得自己符合晒CY提出嘅條件，差在無立即印份履歷表畀CY自薦加入政府。
身兼行政會議成員嘅民建聯副主席劉江華就話，該黨一向好着重培訓政治人才，好似現屆政府咁，佢哋就有三位黨員做咗高官，嚟緊好樂意配合CY嘅組班工作。聽佢講完，大家即刻數數手指，除咗因為劣評如潮嘅Greg蘇外，諗咗好耐先醒起該黨仲有兩個寂寂無聞嘅政治助理，即發展局政助張文韜同民政事務局政助徐英偉。知名度低成咁都無數漏，劉江華真係好好記性！
橄欖唔知醜 大讚蘇錦樑
至於Greg蘇，大家都知道佢搞《競爭法》搞到一鑊泡，之前仲爆出過國籍風波同卡片醜聞，後來因為佢嘅前上司劉吳惠蘭患病辭職，煲呔曾嘅夕陽政府又搵唔到人接替，先至被迫將Greg蘇升正。不過，佢黨友陳鑑林（橄欖）仍然唔知醜，向記者大讚Greg蘇做局長駕輕就熟，表現相當唔錯，完全符合CY要求喎。反而有出席路向營嘅Greg蘇就有自知之明，拒絕回應留任問題，以免自招尷尬。
橄欖之後仲話，政府應該有個培訓政治人才嘅階梯，等啲後生仔可透過加入政府向上游。須知民建聯每逢選舉內部都要爭崩頭，正正係因為老一輩唔肯退位讓賢，令黨內二、三梯隊等到頭髮白晒都未上到位。該黨想將自己一手做成嘅年輕黨員無出路問題，一個唔該推畀下屆政府代為解決，擺明當CY係水魚。
好彩CY絕非傻仔，強調今次佢並非前來揀蟀，嚟緊佢仲會約見其他黨派，聽吓佢哋對下屆政府工作嘅意見同有無好人選提名。梗係啦，如果單靠民建聯提供人選，下屆政府真係死得！據聞CY今個星期會見自由黨，月底再見泛民主派。