中環出更：安宇昭下月當龍爸爸
已故全國政協副主席安子介嘅孻孫安宇昭（Andy），七年前因為結婚而創辦結婚網站及雜誌《大日子》，從此打開佢喺數碼世界嘅一片天地。Andy日前就以大日子行政總裁身份，約會浙江省同鄉聯合會青年委員會一班兄弟姐妹，分享社交媒體及流動資訊嘅新趨勢，場面熱鬧。
諗定囡囡英文名
Andy嘅太太安金志芬及太太妹妹金志菁都有撐場，腹大便便嘅安太五月就生小龍女，今次係第一胎，Andy掩不住初為人父嘅喜悅，佢話囡囡英文名叫Audrey Ann，同佢一樣叫「AA」（Andy Ann）。已有一對三歲孖女嘅浙青主席車弘健就話好想再追番個龍B喎。
通利琴行總裁李敬天（Frank）都係浙江人，當晚佢特登搬咗價值四萬多元嘅意大利Peecker Sound靚音響去助興。Frank係通利創辦人李子文嘅次子，雖然屋企做樂器代理生意，但佢謙稱玩樂器無乜專長喎！