中環出更：鄭承隆掌仁濟 唔唸結婚住
仁濟醫院新一屆董事局就職禮前日喺灣仔君悅酒店舉行，落莊嘅前主席李文斌（Edmond）終於抖啖氣，交棒新主席鄭承隆。當日Edmond輕鬆自若，出席晚宴時甚至連呔都唔戴，相反鄭承隆就滿場飛，忙過結婚辦喜事。但原來新主席仲係鑽石王老五，佢笑稱未來一年都唔會成家立室，要全心做好主席工作喎。
當日到賀嘅政商名流多到爆晒棚，包括東華主席陳文綺慧、博愛醫院主席潘德明、懲教署署長單日堅夫婦等，氣氛熱鬧。前仁濟主席王忠秣亦到場撐冧莊做總理嘅囝囝王賢訊。王忠秣話，好支持阿仔做善事，但最好盡快再添多名孫就好喇！
「辣妹」鄧肇殷 星洲「復活」
華彩集團主席史立德同太太史顏景蓮都喺度，史立德話，日前以太平紳士身份去大嶼山塘福懲教所視察，期間試食監倉嘅咖喱飯，但估唔到會咁好味，佢就畀九十分高分。
靚女總理鄧肇殷當日都盛裝出席，佢話復活節去咗新加坡玩幾日，原來小妮子係鍾意食辣嘢嘅「辣妹」，自然食得好開心。
Edmond太太Amanda就話，半年前已開始同老公一齊返東莞做嘢，老公一星期有五日半喺內地，佢就留低三日，一於陪實老公。
卓妮