候任特首梁振英（CY）偕同妻子唐青儀上京接受委任狀，但係梁太嘅一身衣着畀形象指導狠批，佢嗰副深色鏡片嘅眼鏡仲搞到佢好似戴黑超見領導人咁，略欠莊重。
經濟動力立法會議員林健鋒（Jeffrey）就話，佢三十年前都戴過遇太陽光會變色嘅眼鏡，但因為有一次變唔切色，搞到影相唔靚，自此佢就將副變色眼鏡丟咗，三十年來都冇再戴過變色眼鏡喇。
特首選舉時力挺另一候選人唐英年嘅Jeffrey尋日講起梁太見領導人時嗰副黑超，話自己三十年前都戴過變色眼鏡，不過有次去親戚婚禮時，佢戴住副變色眼鏡影相，副眼鏡變咗深色都唔知，佢睇番啲相時見到自己好似戴黑超咁見唔到對眼，由睇到張相嗰一刻開始，佢決定以後唔會再戴變色眼鏡。