新政府正密鑼緊鼓組班，但一直盛傳會入閣嘅亞洲金融集團總裁陳智思（Bernard），似乎對生意仲有興趣。大家都知Bernard個家族喺泰國經營私家醫院，佢尋日接受電台訪問時就講明，其公司對黃竹坑塊私家醫院用地好有興趣，仲自爆嚟緊呢幾日應該會正式入標添！
Bernard坦言，特首選舉令佢見盡風雨，明白依家做事要「超級小心」，為咗留個機會畀自己投地，所以暫時唔會考慮入政府喎。Bernard無做立法會保險界代表後，呢幾年專心接手家族生意，以生意為先可以理解，估唔到佢諗得咁透徹，知道乜嘢叫避嫌，好過依家啲高官多多聲，否則又點會爆出涉嫌利益輸送醜聞吖！
不過，Bernard亦無斷自己後路，話投標結果出咗後，如果新政府仍有意搵佢加入嘅話，到時一定會好好考慮喎！聽落佢嘅安排同部署好完美，但世事嘅嘢有無咁着數呢？