中環出更：沈祖堯賞花吟詩鬆一鬆
春天悄悄來臨，最適宜遊園玩樂。中文大學前日就喺花草茂密嘅崇基學院未圓湖，舉辦咗首個文化盛會「博群花節園遊會」，連校長沈祖堯都忙裏偷閒同一班學生齊齊賞花吟詩、寫書法、留倩影、歎茶點，認真寫意。沈祖堯話，舉辦呢個活動係要鼓勵中大人放慢腳步，親親美麗校園，反思人生、珍惜當下，然後帶住夢想同希望，奔向將來喎！
邀潘迪華任音樂總監
現場設有林蔭草地靜思區，讓來賓停低細嚼詩詞。當日唔少名人都有去湊熱鬧，好似國際知名詩人作家、中大東亞研究中心人文學科講座教授北島，以及世界知名文化研究學者、中大冼為堅中國文化講座教授李歐梵等。大會仲邀請咗名歌星潘迪華擔任音樂總監，聯同唱作歌手林一峰表演，大家仲合唱《What a Wonderful World》，氣氛好熱鬧。