中環出更：楊華勇小登科 努力造人
近日政商界喜事多，福建幫頭領、全國政協常委楊孫西公子楊華勇（Johnny）都娶得美人歸，前晚喺尖沙咀洲際酒店筵開六十圍，新娘子乃係內地做房地產嘅雲南省政協常委莊哲猛千金莊菲娜（Fiona），可謂門當戶對。首次做新老爺嘅楊孫西成晚笑不攏嘴，佢話恨咗呢杯新抱茶好耐，仲話對新抱好滿意添！
當晚新郎哥嘅兄弟團陣容鼎盛，有百仁基金主席施榮忻（Jaime）、政協委員盧文端囝囝盧金榮、莊士集團太子爺莊家彬、廖創興家族後人廖偉麟、富豪趙世曾公子趙式浩等。青聯同菁英會成員鄭志剛、陳仲尼、白富鴻、洪為民、葉振都、曾智明、林忠豪等亦有現身撐場。
菁英會充「紅娘」
同場名人仲有「牛仔褲大王」楊釗、遠東創辦人邱德根孫女邱詠筠、名媛鄭詩韻等，連跌傷手嘅教育局局長孫明揚夫婦都去湊熱鬧。
Johnny同Fiona嘅「紅娘」原來係菁英會，Johnny去年參加該會舉辦嘅一個四川交流團，喺機場上邂逅Fiona，隨即擦出愛火花。Johnny話，佢哋首次相遇已經情投意合，仲視對方為結婚對象，所以相識唔夠一年就拉埋天窗喇！當晚二人喺婚禮上互訴愛的宣言，承諾會好好愛錫對方，Johnny仲話會努力「造人」添，咁楊孫西咪好快有孫抱？
Jaime人到禮又到，揀咗三支極品佳釀畀一對新人，希望佢哋嘅婚姻好似美酒咁，愈釀愈香醇。至於婚後去邊度蜜月，Johnny話仲未諗好，但會先放番兩日假，過吓二人世界先喎。
卓妮