日曬雨淋做粗重工夫養妻活兒已經夠辛苦啦，萬一有乜冬瓜豆腐衫長褲短，事主固然有機會小命不保，連累家人更加係慘絕人寰。好衰唔衰香港有一個特衰政府，間接害到工人死傷枕藉！
嗱，死傷枕藉呢四粒字絕無誇張成分，功夫茶並唔係屈機。唔講大家未必知道，根據工業傷亡權益會統計，過去一年最少有十五名政府外判工人開工期間死亡，平均每個月超過一人因工殉職，仲未計僥倖逃過鬼門關嘅受傷個案喎，你話係咪痛心疾首吖！
因乜事幹死得人多嘅呢？好似今年四十七歲嘅王祖福，原本係建築署外判公司聘用嘅工人，負責清理斜坡上面嘅雜物。○九年七月，王祖福喺黃大仙龍翔道公園一處斜坡開工，唔覺意一失足成千古恨，懷疑頸部猛撞路面石壆導致全身癱瘓，住院留醫長達兩年，期間所受到嘅折磨不足為外人道。執番條命但係動彈不得嘅王祖福就話嘞：「以前公司都有提供安全設備同職安課程，不過做外判工，冇安全帽，冇安全鞋，安全帶都唔係個個有。」出事原因正正係當時身上冇佩戴安全帶。
另外一位叫做梁國橋嘅仲慘，身為地政總署外判鋸樹工人嘅佢，今年一月從四十呎高嘅大樹墮下死亡。根據梁太憶述，丈夫生前被問到工作期間有冇安全措施，答案係：「乜都冇！」
喂，成日都講啦，政府將工作外判出去，唔等於責任都外判，做官嘅只要稍有血性同良知，都唔會罔顧外判工人嘅命仔。問題係冷血官僚置若罔聞，不但止監管甩甩漏漏，連事後追究都懶到出汁，極少懲處相關外判公司以收阻嚇作用。難怪工會組織直斥其非，政府縱容外判公司漠視工人安全，正係連番奪命個案嘅元兇！
其實早於○七年，審計署已經發表過報告，批評食環署、康文署、房委會對於外判服務承辦商監管不足，促請各部門加強規管處分違規人士，以保障工人權益。事隔五年嘞，監管措施冇明顯改善，如果唔係，過去一年都唔會平均每個月都有人死啦！
提到外判責任，功夫茶認為特衰政府之中最大嘅責任外判商係曾蔭權。唔係咩？煲呔曾一味貪威識食，眼中只有黐飲黐食嘅富豪，全無捱生捱死嘅工人，喺一個貪腐醜聞纏身嘅特首領導之下，官僚有乜可能唔係冷血吖！
所以話啫，唔該下屆政府生生性性，麻煩下任特首醒醒定定，如果繼續將監管外判服務承辦商嘅責任外判，莫講話工人死不瞑目，就算旁觀者都有衝動，要求大官小吏將自己嘅職位外判出去！