阿溢戰腦癌 盼延續奇迹
癌症可怕，但總有奇迹！劉子溢九年前證實患上腦癌，已五度進行開腦手術切除惡性腫瘤，「醫生○三年嗰陣已經話我最多得番一年半命，但竟然可以活到呢一刻，我覺得係奇迹，唔想放棄！」求生意志雖強，可惜阿溢腦內腫瘤持續增大，用以控制病情的藥物及療程需費高達十萬元，每日與死神搏鬥的阿溢希望透過東方日報慈善基金向善長呼籲，協助延續生命奇迹。
現年五十三歲的劉子溢現與妻子生活簡樸，但知足常樂，自右腦出現惡性腫瘤後，即與身懷計時炸彈無異。阿溢於○三年首度進行開腦手術嘗試「拆彈」，惟前後接受五次手術仍未能根治，「個腫瘤依然不斷復發，而且愈生愈快，醫生話如果大到四至五厘米，我個腦就會爆。」
化療折磨體虛氣弱
阿溢不但要每天面對死亡威脅，亦要忍受頭部陣陣劇痛，「咁多年嚟捱咗咁多刀，右邊腦好多腦漿都冇咗，最慘係左邊身麻痹晒，幾乎癱咁滯，連手都舉唔到，又唔跌得，事關一跌低就起唔番身！」一次又一次的化療把阿溢折磨得體虛氣弱，回憶從前每星期打羽毛球的歲月，如今卻成奢望，「每次電療之後都嚴重貧血，冇氣冇力，行一陣就要抖一抖。」
由於開腦手術需全身麻醉，令阿溢的記憶力大大受損，更會不時出現腦袋一片空白的情況，「但我真係好想好番，報答一直以嚟支持住我嘅屋企人！」說到至愛的家人，阿溢臉上終於展露一絲微笑，也許正正就是這份無私的愛，一點一滴地描繪出這個生命奇迹。
港島西醫院聯網發言人證實，病人曾接受化療，由於藥效太強導致貧血，需要連續數月接受多次輸血。今年二月進行的磁力共振掃描結果顯示，病人腦部腫瘤有增大迹象，醫生建議使用另一款自費化療藥物「替莫唑胺」（Temozolomide）以控制病情，估計共需六個療程，全期藥費約為十萬元。捐款編號：12244
記者：何穎賢