就連小學雞都知道，一些蝴蝶嘅花紋有威嚇敵人嘅作用。或者就係因為咁，煲呔曾前日喺特首辦接見特首當選人梁振英（CY）時，就換咗佢隻粉藍色蝴蝶煲呔出來，莫非係想威嚇吓CY？尋日行政會議開會，煲呔曾繼續拒答問題，但當佢一聽到問佢戴粉藍色煲呔係咪繼續撐唐唐時，佢就忽然停低腳步，然後稍稍向右轉九十度，嘴角緩緩向上一翹，展示一個耐人尋味嘅奸笑。
據聞CY上任特首後，行會將會大換班，最少有一半非官守成員無得留低。尋日行會召集人夏佳理、胡紅玉等人去開會時，始終都無回應CY有無接觸過佢哋，而劉遵義開會後仲寧願獨自吹風等車，都唔肯同記者寒暄兩句。
至於近日表示「無講過無興趣做」港交所主席嘅查史美倫，亦都唔肯開金口。不過，教育局局長熱門人選張炳良，尋日就春風滿面，選擇喺特首辦正門離開，問佢係咪真係做局長時，佢就繼續微笑。