城中富豪同商界瞓身力撐嘅唐英年，喺特首選舉中變成輸家，呢場意外戰果，好多堪輿學家始料不及，但尋日我哋就發現有位高人測中咗，就係堪輿界人士袁御庫。佢去年十二月出版及編寫嘅龍年流年自救手冊嘅運程書，就講到明梁振英（CY）會贏硬，縱使當時唐營要人有人、要財有財，但佢都批死唐唐運勢「眾人皆醉，須防大意失荊州」，真係準到你唔信！
袁師傅喺書中話，佢同CY及唐唐都有一面之緣，感覺CY果敢，唐唐圓滑，兩個人都係大將之才。但佢對CY嘅命理批示係「順應官運，領導抬轎佔鰲頭」，話CY運行丁丑，此命以丁、甲為用神，踏入四十九歲後用神最真，今年更進入最佳官運之時，佢仲提醒CY要小心被男性朋友出賣。
咁唐唐又衰乜呢？袁師傅話，唐唐係大富豪之命格，一生無憂，大運從○二年開始一路扶搖直上，佢嘅作風亦係敦厚圓滿，但看似順風順水，身旁阿諛奉承者眾，因此眾人皆醉，如不能及早發現及對應問題，時機一過，只怕恨錯難返！結果如何，大家知啦！