政情：葉劉扮葉問 親證「好打得」
特首選戰塵埃落定，依家輪到下屆政務司司長（CS）職位爭奪戰。新民黨主席葉劉淑儀連日大打開口牌想做CS，仲講明唔會做「妹妹」林鄭月娥嘅下屬，但目前「好打得」嘅林鄭仍被看高一線。葉劉唔夠打，佢早前就返咗家鄉佛山南海一趟，仲到訪「一代宗師」葉問紀念館，一見木人樁就即時葉問上身，打番兩嘢，莫非佢要證明自己都係好打得？
葉劉日前喺社交網站facebook開個名為「佛山考察團之葉問上身篇」，分別參觀葉問紀念館內嘅祠堂及民居，其中民居係仿照葉問嘅老家「桑園」而建。
今次佛山之旅，葉劉仲返到祖屋探望鄉親，又去到劉氏大宗祠睇吓，原來佢上次回鄉已經係一○年嘅事。有網民留言，提醒葉劉佛山祖廟嘅北帝好靈嘅，莫非佢想叫葉劉去拜神，祈求仕途心想事成？