政情：拖欠遣散費 黃家和蒙冤
尋日我哋收到一位匿名市民報料，話之前喺大埔富亨邨結業嘅連鎖茶餐廳「大排檔」拖欠員工遣散費，不滿大排檔老闆、餐飲聯業協會會長黃家和（Simon）之前喺報紙度大大聲講，會按法例賠足畀員工，話佢講大話。不過，我哋經過一輪查證後，原來Simon被人冤枉，佢對事件感到好無奈，唔知係咪因為選舉問題被人惡意攻擊。
我哋搵過Simon了解事件，佢話大排檔二月一日正式結業，共遣散九個員工，一切賠償已經喺本月十三日至廿二日期間支付，尋日仲特登叫會計部同事問清楚每個遣散員工收到錢未，有七人已表明收到錢，餘下兩人因為未查銀行戶口，所以未知收到錢未。
投訴人未查清楚戶口
不過，最奇就係投訴人事後又回覆我哋，話佢已經收到錢喇，既然咁緊張賠償，點解唔查清楚銀行戶口先呢？