政情：CY想落區謝票 警方反對
特首當選人梁振英（CY）當選後翌日一連走訪多個地方，點知有人質疑，佢競選期間將七百萬人掛喺口邊，為何當選後唔係巡遊各區多謝市民？根據可靠消息透露，其實CY並非唔想落區謝票，而係依家身份確實唔同咗，出出入入都要有警察傍住，保障佢嘅人身安全，遲遲唔可以落區多謝市民支持，全因為警方以保安理由唔建議佢咁做喎。
相信大家都聽過，負責保護政要人身安全嘅，係俗稱「G4」嘅警方保護要人組，呢批警員受過專業訓練，有需要時更加要挺身而出，為保護對象，甚至擋子彈都在所不計。至於保護特首嘅G4當然就更加訓練有素同小心，每次特首出席公開場合，班G4都會率先抵達現場視察環境，以及同在場保安人員溝通，以防萬一。
班G4咁小心保護CY安全，樣樣事情都希望做到滴水不漏，自然唔贊成佢拋頭露面落區謝票啦。消息話，其實CY一直想盡快同支持者及市民見面，更一度考慮過用番佢競選期間嗰部宣傳巴士落區，只不過警方一力反對，認為咁樣好唔安全，如果一個唔覺意引起混亂，搞到CY有乜損傷，佢哋真係擔當唔起喎。
近年示威愈來愈激烈，G4有咁嘅顧慮都可以理解，再加上CY部宣傳巴士係開篷嘅，保護難度確係又多幾分，點知到時會唔會有人搵嘢掟佢，甚至使用攻擊性武器。據講CY陣營亦明白警方嘅憂慮，所以唔堅持要做謝票活動，但CY內心就奇怪點解要咁加強保安，尋日佢接受電台訪問時亦話，希望遲啲市民對佢嘅興趣無咁大時，可以減少保護人手，等佢真正做到一個親民嘅特首。
競選辦書枱 小睡「梁」伴
有競選辦核心成員透露，CY當選翌日走訪幾場已經算係小兒科，事關佢競選期間經常無覺好瞓，往往凌晨十二點鐘都仲會覆電郵。
仲有一則趣聞，據聞競選期間不時有人建議買張床畀CY，等佢可以直接喺競選辦休息吓，但就畀CY拒絕，所以競選辦同事不時都會見到CY伏喺枱面瞓着咗咁話。