小圈子揀特首，蟻民冇份，只係得個睇字，無論真命天子係乜誰，最終大家只能接受。好在香港仲有言論自由，旁觀者噴吓口水發吓牢騷，總算不至於又拉又鎖。
呢，一批劏房租戶趁特首選舉，喺票站附近搭起板間劏房，通宵露營，抗議小圈子選舉候選人「三無」：無關顧基層市民住屋需要、無長遠房屋政策、公屋上樓夢又遙遙無期。佢哋不滿當局冇制訂完善嘅安置政策就夾硬迫遷，要求「先安置、後清拆」，加快興建公屋，畀佢哋盡快上樓。
呢頭權貴精英雲集選特首，嗰頭基層市民瞓街「贈興」，各自各精彩，直頭好睇過花燈。話時話吖，無論第日邊個入主禮賓府，房屋政策都係社會各界關注焦點，新特首一定要回應市民要求。
冤有頭，債有主，樓價失控，租金狂升，大財團巧取豪奪，小市民無瓦遮頭，仇富心態不斷蔓延，社會矛盾一觸即發，罪魁禍首就係曾蔭權。
煲呔曾上台七年，禍港殃民七年，施政最大敗筆就係所有政策都向利益集團嚴重傾斜。發展經濟獨沽一味靠金融地產，罔顧高地價政策飲鴆止渴嘅嚴重後果，搞到土地供應多年來嚴重失衡，樓價租金「比翼齊飛」，無論商戶經營成本定市民生活成本都水漲船高，中小企業、普羅市民苦不堪言。高地價、高樓價、高租值嘅畸形格局，令發展商賺到盡，市民淪為「房奴」、「租奴」，但煲呔曾淨係掛住「曾商勾結」，黐飲黐食，對低下階層嘅困境視而不見，關人個關。
公屋等到頸都長，居屋又停建，私樓租金又難以負擔，唔想瞓街嘅，惟有租劏房棲身。不過咁，話就話劏房，租金一啲都唔平，豆腐膶咁大嘅地方，月租閒閒哋四、五千蚊，幾乎等於好多低薪打工仔成個月糧，如果按呎租計，仲貴過半山豪宅，問你點頂？咪以為住劏房係低下基層專利吖，近年愈來愈多中產人士亦淪為劏房常客，簡直係香港之恥。
調查顯示，全港有近十萬人以劏房為家，煲呔曾究竟又為佢哋做過啲乜？公屋長期供不應求，佢誇下海口話可以三年上樓，其實根本就係玩數字遊戲，唔少申請個案輪候時間長達六至七年。至於居屋咯喎，佢一拖再拖，拖到臨落台至扮晒嘢拍板復建，表面睇係補鑊，其實係推畀下屆政府，等居屋起好，佢都唔知喺邊度優哉游哉歎世界咯！
樓價租金高處未算高，市民望樓興嘆，中產不斷向下流，貧富懸殊，社會倒退，民怨沖天，呢啲就係煲呔曾治港七年嘅「政績」嘞！