政情：房霸林偉強激嬲鄉紳
鄉議局副主席林偉強同部分鄉紳唔咬弦已係公開嘅秘密，佢最近又惹是非，有鄉紳投訴佢助理疑似獨霸房間，搞到要喺日前執委會上提出臨時動議討論事件。據講批評聲音一面倒，最後仲要副主席張學明打圓場。
話說鄉議局新大樓一樓有間助理秘書室，正、副主席嘅助理都可以使用，但主席劉皇發同張學明嘅助理一直都無用到，只有林偉強嘅助理用間房，用完就鎖埋間房，其他人根本無機會使用。會議上，有多名鄉紳不點名質疑林偉強獨霸房間，更有鄉紳就暗寸係咪間房入面收埋張「梳化」唔見得人，認真搞笑。
鄉紳批評林偉強之聲此起彼落，最後要張學明出手解圍，建議配番啲房間鎖匙畀其他鄉紳使用，先至能夠暫時平息事件。我哋曾經就此事搵過林偉強，但截稿前都未有回覆。