政情：田二少挺梁幫理不幫親
各大陣營嘅特首選委尋日已經有最後投票意向，新民黨亦公布咗佢哋嘅投票決定。該黨副主席田北辰（田二少）被人問到佢支持候選人梁振英（CY）嘅話，會否同阿哥田北俊分道揚鑣呢？田二少聽完後好不以為然，強調兄弟都可以有唔同政見，主席葉劉淑儀更幫口話，李國章兩兄弟都有唔同支持對象啦！
呢場選舉罕有咁激烈，由提名到近日形勢逆轉、仍死撐候選人唐英年或白票嘅田北俊一直撐到底，懶理邊個候選人嘅民望高啲。反而田二少就一直好着重民調，聲言無理由揀一個民望低嘅人喎，所以決定支持CY。田二少爆料話，有人打過電話游說佢今日投白票，但佢就否認打電話嘅人係佢阿哥。
曾經入過自由黨嘅田二少，以前同阿哥嘅政治理念好相近，但今次佢支持CY，會唔會同阿哥喺政治路上愈行愈遠呢？佢就即刻反駁話，兄弟都可以有唔同選擇，事關個個人都有獨立思考，兄弟還兄弟，朋友還朋友，唔覺得有問題喎。