每逢香港有大事發生，又係「民主阿婆」陳方安生同自稱要「日日做漢奸」嘅李柱銘出動嘅時候。港大特首全民投票延長到尋日下午，港島區開多咗幾個票站，但居於港島區嘅民主阿婆同李漢奸有近嘅票站唔去，反而去咗最多傳媒聚集嘅理工大學投票，之後民主阿婆仲不甘寂寞去中環參加埋反對中央干預特首選舉嘅遊行添。
民主阿婆同李漢奸尋日喺理大票站一唱一和，話即使網上投票恢復運作，佢哋都會選擇用啲古老方法到票站投實票。既然網上投票系統都整番好，兩老仲咁堅持唔肯用電子投票，究竟係唔識上網、食古不化吖？定係不甘寂寞想傳媒用咪牌扑佢哋，企圖抽政治油水呢？咁就真係不得而知喇！
不過，諗諗吓如果民主阿婆唔親自去理大投票，又點樣通知各大傳媒佢下午會去中環遮打花園參加遊行吖！但今次民主阿婆遊行又係一如既往半途而廢做逃兵，並無行到終點中聯辦，究竟佢係禁足西環，定係又趕去恤髮呢？唉，其實都做得阿婆啦，舟車勞頓只為傳媒咪牌一扑，咁又何苦呢？