政情：山東幫總動員為CY助威
新特首今日誕生，候選人梁振英（CY）被看高一線，旅港山東幫一班支持者已為CY當選做好準備。前山東商會副會長梁紹莊（Tommy）話，近期佢哋忙到飛起，分頭部署幕後工作，包括登報恭賀CY當選。今日選舉決戰日就更加緊張，香港山東青年會主席丁華已發動後生仔會員到場霸位，為CY吶喊助威，見證老鄉勝出嘅歷史一刻。
對於CY參選特首，山東人都與有榮焉，早已準備開香檳慶祝，但詳情仲未決定。Tommy話，今日塵埃落定後，最好可以返屋企瞓番個好覺，事關投入呢場選戰實在太攰喇！至於另一名支持CY當選嘅導演高志森，尋日就剖白話，當初佢未決定提名邊個候選人，但見到十幾架吊雞車聚集喺唐英年九龍塘大宅門口嗰一刻，即時叫秘書填表提名CY喎。