政情：拉票衝刺 小丑又上身
特首選舉今早舉行，喺競選期間先後多次失言嘅候選人唐英年，尋日把握最後機會現身向選委拉票，但佢依然係小丑上身娛樂大家。唐唐首先開口夾着脷將「投票站」講錯為「投票箱」，之後又長他人志氣滅自己威風，衝口而出講咗對手梁振英（CY）競選口號中「齊心」兩個字，可惜事後仍懵然不知。唐唐到最後關鍵時刻仲係失誤多多，真係好應該自我檢討吓。
民望大落後嘅唐唐尋日喺中午時分，把握最後機會喺其灣仔競選辦樓下舉行記者會向選委拉票，起初佢嘅講話都正正常常，開口埋口好似播帶咁呼籲選委憑良心投票，但之後講到投票安排嘅安全問題時就即刻露底，突然話「每一個選委都可以入到投票箱憑良心投票」，原來佢眼中嘅選委係渺小到可以入到「投票箱」，而唔係入「投票站」投票，認真貽笑大方。
「齊心」趕走支持者
唐唐娛樂大家嘅失言總係一不離二，佢提及幾日前已經開始聽到對手話攞到七百票，目的係想動搖唐營嘅軍心，佢反駁話自己過去兩日接觸選委支持者後，發覺班支持者非常「齊心」，堅定不移咁支持佢。不過，唐唐完全無意識到「齊心」兩個字係CY嘅競選口號，變相公開為CY宣傳，間接趕走自己嘅支持者，唐唐此舉簡直猶如向自己嘅選情「倒米」。
事實上，唐唐自去年九月底辭去政務司司長職務，開始「備選」特首後，非但未能有效展開競選工程，亦未能將自己同現屆政府嘅施政失誤切割，反而貫穿選戰嘅係多次失言及連串醜聞接連爆發，最為人熟悉嘅係含糊其辭以「挖深咗」回應其九龍塘大宅地牢僭建醜聞，又自言「有膊頭，有腰骨」，但事件被踢爆後頓誠信盡失，仲要擺老婆上枱擋駕，真係自打嘴巴。
今日特首選舉花落誰家，相信唐唐心中有數，究竟到時佢如何面對選舉結果，對佢嚟講都係一個重大考驗，如果萬一輸咗仲係亂噏廿四將責任歸咎對手，相信只會係繼續做小丑娛樂大家。