中環出更：陳燭光浴火重生 耀「舞」揚威
香港著名教育家陳樹渠嘅千金陳燭光（Zandra），係社交圈少有鑽石級淑女，家底深，學歷高，千金小姐唔憂嫁。不過，Zandra就自嘲係「宅女」，兩年前更因為母親辭世，心結難解患上厭食症，直至遇上標準舞運動後浴火重生，令整個人如沐春風，脫胎換骨。跳舞，已成為佢嘅最佳情人。
Zandra生於富裕之家，自小家規嚴，好似跳舞呢啲太過拋頭露面嘅活動，佢諗都未諗過，就算留學外國時想主修藝術史，都被家人反對，最後還是選修經濟學，並修讀法律，畢業後當上律師，除咗返工，就係躲在家中睇書。Zandra嘅內向性格隨着母親去世，變本加厲，仲患上厭食症添。
後來Zandra偶爾遇上社交舞老師張世華，從此走出陰霾，從舞中尋找真我。一舞上癮後，Zandra拜師世界級名師，去年拍住標準舞世界排名廿四嘅Mathias Kehlet參加大小比賽，贏得「全球舞王挑戰賽拉丁舞師生組冠軍」。Mathias長駐丹麥，Zandra都不惜付機票錢請老師來港上堂，印證佢對舞蹈嘅愛好程度。
感情路跳「慢四」
雖然舞場上勇往直前，但Zandra嘅感情路上仲係跳緊「慢四」，步步為營，佢直言追求者不絕，但芳心不想錯許他人，寧願繼續等待愛喎！
卓妮