既然政壇傳聞○三年政府硬推《基本法》二十三條立法之時，有人鼓吹出動防暴警察施放催淚彈鎮壓示威者，甚至出動解放軍，功夫茶真係有一個諗法，一於衝入立法會掟個催淚彈鎮壓保皇黨！
大家一定會問，因乜事幹咁激動呀？答案好簡單，一味顧住擦鞋嘅保皇黨簡直就係禮義廉，無恥到居然為貪腐醜聞纏身嘅曾蔭權保駕護航，不惜踐踏香港核心價值。你知啦，廉潔奉公係香港一直引以為傲嘅固有形象，家陣忽然之間多咗一個傍實富豪黐飲黐食嘅「香港第一貪」，理論上為民請命嘅立法會議員當然義不容辭打老虎啦。所以咯喎，有議員提出動議，要求引用權力及特權法調查曾蔭權貪腐醜聞，實在係民意所趨嘅應有之義。
之不過好衰唔衰，保皇黨築起血肉長城，恃住人多欺負人少，竟然逆民意而動，投票否決咗呢一個動議。擦鞋議員私相授受為貪曾提供保護罩，政務司司長林瑞麟當然護主心切食住上，呢一部人肉錄音機好厚臉皮咁話，行政長官多年來施政全面，盡心盡力為民生努力，○五年已表明會接受必要嘅防賄規範，○八年亦已修訂條例。林公公認為，由於各方正進行有關工作，因此冇必要再以權力及特權法調查。
提出動議嘅議員認為，貪曾事件有十個疑團未解開。可惜吖，保皇議員講出一個好牽強嘅反對理由，話立法會調查會令人以為質疑廉署公信力，亦會為廉署調查增加不恰當壓力。嘥氣啦，立法會還立法會，廉署還廉署，咁都可以扯埋一齊混淆視聽，簡直九唔搭八。
睇怕，香港注定要繼續沉淪。冇耐前之嘛，有間機構發表最新廉潔度調查，香港排名三甲不保，下跌至第五位，競爭對手新加坡連續四年蟬聯榜首。受訪者認為特區政府檢控貪污嘅成效同打擊貪污嘅決心都下降，相信係因為曾蔭權同特首候選人嘅連串醜聞所致。
冇錯嘞，如果香港可以嚴懲貪曾，廉潔度排名或者有機會止跌回升。家陣唔係喎，禮義廉到極嘅擦鞋議員包庇護短，排名唔再跌都冇天理啦。不過咁，人在做，天在看，九月立法會選舉之時，選民必定會以選票好好懲罰呢班無恥之徒！
計功夫茶話齋，既然引用權力及特權法查貪曾被否決，咁不如索性啟動彈劾程序仲直接喇！