城市大學校長郭位嘅任期原本到下年五月，正當城大上下仲拗緊郭位表現好唔好、應唔應該繼續做校長之際，校董會已經喺星期二嘅會議上，極速通過郭位續任城大校長五年，任期去到二○一八年五月，城大學生、教職員對校長神秘續任無不嘩然，大鬧大學黑箱作業。
有大學校董爆料，話郭位續任並無列入原定議程，校董都係喺開會前幾日，突然接到通知，話會喺開會嗰陣討論「神秘議案」，主要係關於郭位續任嘅問題，到咗開會嗰陣，先有文件交代郭位續任嘅前因後果，校董仲要即時議決，諗多陣都唔得，搞到有校董不滿離場。
城大教職員協會話，大學咁倉卒就通過校長續任，之前又無大規模收集學生同教職員嘅意見，做法好有問題，唔少教職員依家仲好氣憤。有學生就話，到依家仲對校長續任一事一頭霧水，大學有責任澄清。教職員協會已打算向審計署同教資會投訴，要求大學畀個滿意答覆。