政情：蕭嘉怡辦事處星光熠熠
區議員辦事處一向係處理市民大小投訴嘅大本營，市民推門入內大多係有冤無路訴，希望當面向當區區議員陳情代為申訴，中西區區議員蕭嘉怡正式嘅辦事處雖然仲未有着落，但佢喺臨時議員辦事處至今已經收到唔少投訴要跟進，平時亦隨時歡迎市民入內變身市民嘅休息室，唔講唔知最近更吸引到明星路過停留添。
嘉怡最近喺社交網站，張貼咗兩張喺自己辦事處同明星嘅合照，即時惹來網民數日內留下數十個留言，包括觀塘區議員柯創盛都讚好。有網民留言時大讚嘉怡有一顆善良嘅心借出場地，另有眼利嘅網民仲發現外表嬌滴滴嘅嘉怡企喺呢兩位明星隔籬，好似笑得有啲唔自然添。
嘉怡話，有機會同明星合照其實只係巧合，因為咁啱有部電影喺辦事處附近開鏡拜神，該部電影嘅公關又想搵個地方畀班演員同工作人員休息，所以就借畀佢哋入內坐坐，唔知嘉怡呢個臨時嘅市民休息室，下次會有乜大明星會路過呢？