政情：譚志源拍心口保證暗票
特首選舉後日投票，今次講明係暗票，即係無人知選委投咩票，但政界一直流傳中央會出盡高科技方法，知道選委投咗畀邊個。民主黨涂謹申就建議政府，應該喺投票間加設天花板，等人偷拍唔到，另一個方法就係將票箱變成夾萬，就算有特工要撬開票箱驗指紋，都無咁容易喎。
唔知係咪聽到阿涂咁講，政制及內地事務局局長譚志源即刻走出嚟澄清，向一千二百名選委大派定心丸。佢話政制局唔係拍緊CSI（滅罪鑑證科），唔會拎張選票去驗指紋，亦唔會畀人咁做。譚志源仲話，政制局會加派人手看守票箱，選委喺票站入面都唔可以影相或者交談，投完票亦唔可以逗留，相信畀人知道投咩票嘅機會係等於零。
建制派冇條件投白票
局長講話就係咁，信唔信就由得班選委自己決定，不過北京開到聲話唔想流選，相信班「識時務」嘅選委都唔敢逆阿爺意思，走去投白票嘅。況且如果咁夠膽，一早走去做反對派啦，使咩忍氣吞聲做建制派喎。