政情：唐唐轉性有驚天陰謀？
特首選舉候選人唐英年以往畀人嘅感覺都係謙謙君子，成日笑騎騎，但係佢早前就喺電視辯論自爆行政會議內容，攻擊對手梁振英（CY）。外界對佢嘅「自殺式」舉動都大感意外，個個都話好奇怪。有人認為唐唐發官仔脾氣，甚至有資深親中人士懷疑，其實有個驚天大陰謀，就係唐唐已經畀人收買，目的就係要打擊下屆政府嘅管治。
唐唐之前喺特首選舉候選人電視辯論度提出「防暴論」，話CY曾經喺行會講要用防暴隊同催淚彈對付示威者，又話CY提出要縮短商業電台續牌年期，CY之後已經多次否認指控。外界對於唐唐「忽然勇猛」都好多揣測。前教統局局長李國章尋日就喺電台節目度話，雖然自己提名咗畀CY，但其實過往同唐唐接觸多啲，又話唐唐非常好人，唔會同人嗌交，唐唐近日所為唔似佢認識嘅唐生，懷疑佢後面啲人唔知邊個喺度教佢做埋啲咁嘅嘢，對佢唔公道咁話。
唐唐本來係「大熱」，理應坐定粒六，點知畀人踢爆大宅僭建地庫，又有連串婚外情同私生子傳聞，搞到民望插水。李國章就話，「佢可能覺得應該特首係佢o架喇，爸爸（唐翔千）同江澤民老友記，又有家底，點知咁多事爆出嚟。」所以唐唐會諗「我唔得你都唔得」，直言唐唐「有少少官仔脾氣囉」。
林大輝拋「平反六四」夠嚇人
李國章就話，自由黨唔投票畀CY，係小朋友嘅作風。自由黨青年團就此發表聲明，話對李國章嘅言論深表遺憾，要求李國章收番佢嘅言論喎。
其實唔少挺唐嘅人都來自地產界，佢哋同內地嘅關係不嬲都千絲萬縷，理應都唔會想唐唐去到咁盡、搞到咁僵，費事返唔到轉頭。但係唐唐依家就好似「脫韁」完全唔受控制，有資深嘅親中人士就話，可能唐唐背後嘅力量唔止地產商，仲涉及外國勢力，所以要佢喺香港搞搞震喎。
話時話，唐唐性情大變，佢嘅支持者都變得唔多正常，有唐英年家臣之稱嘅林大輝尋日出席一個電台節目話，呢次選舉就係一場比賽，未到最後未知邊會個贏。
佢仲話，現時梁、唐二人係「六四之爭」，梁振英的確有優勢，但最尾唐唐可能「平反」敗局喎。連平反六四都講埋，唐營都去得好盡喎。