中環出更：甄韋喬WhatsApp開家庭會議
「清潔王子」利興控股主席兼菁英會秘書長甄韋喬（Mickey）好重視家庭，除咗一齊做嘢，仲經常齊齊四出搵好嘢食。日前佢哋幫襯金鐘新店四合軒，大擦正宗京菜。
兩子暑期工餵蝨
做清潔工人起家嘅Mickey話，好鼓勵囝囝出去體驗投身工作嘅滋味，於是喺外國留學嘅大仔Aaron，去年放暑假返港，就帶埋讀緊高中嘅二仔Baron去廢紙回收場做暑期工。Baron記憶猶新咁話，回收場又熱又焗又污糟，每日做八粒鐘，對腳畀蝨咬到飛起，深深體會到搵錢唔容易，自此的起心肝發憤讀書。
當日Mickey叫咗幾道北京小菜，松子黃魚炸得鬆脆，配酸甜汁唔覺膩，虎皮尖椒肥大多汁，奶油金腿津白軟腍冇渣，片皮鴨脂肪少，夠晒健康。Mickey話家庭和睦嘅秘訣，就係要忙裏偷閒，所以一家大細逢周六就去睇戲，平時以手機程式WhatsApp開家庭會議。
講到公司近況，Mickey話最頭痕買勞保，事關清潔業屬全港索償率最高行業。日前佢有份發起嘅環境衞生業界大聯盟開辦安全督導證書課程，加強員工職安健知識，減低工傷。