中環出更：郭李天穎行動撐世姪女
香港舖租昂貴，唔少年輕人都選擇喺樓上舖創業，其實只要貨品夠晒特色，都唔愁冇客路。好似新鴻基地產非執行董事郭炳湘嘅夫人李天穎，尋日就現身中環擺花街嘅樓上首飾店「The 9th Muse」，原來間舖係世姪女、陽明山莊發展商僑福企業創辦人黃週旋孫女黃采笛（Charlotte）同朋友合資開設，郭太對後生女嘅審美眼光讚不絕口，仲即時睇中一副太陽眼鏡及手挽包（Clutch），為自己扮靚添！
尋日下午四時，着住件黃色大褸嘅郭太神采奕奕來到，Charlotte嘅媽媽、食物回收機構「膳心連」創辦人黃林碧瑢都喺度，佢同郭太相識近三十年，兩人經常一齊拍住做善事，情同姐妹。
試戴名歌手囡囡設計黑超
郭太好似熟客咁行咗個圈，指住陳列櫃一條黑白藍三色頸鏈話，日前已買咗一條送畀囡囡。未幾佢又被美國名歌手Lionel Richie囡囡Nicole Richie設計嘅黑超吸引，即場試戴。
Charlotte話，自從喺美國學成歸來後，發覺城中售賣嘅時裝配飾一係太貴，一係款式唔啱心水，於是就同好友張婧一齊創業，蒐羅世界各地別具風格嘅配飾或家居用品，仲有名家設計飾品。黃太好欣賞囡囡嘅品味，笑稱自己係最大嘅客戶添！
卓妮