嘭嘭嘭嘭！戰鼓擂響！嘭嘭嘭嘭！戰鼓擂響！夠膽做就唔怕認，有種就唔好做縮頭烏龜！
咦，發生乜嘢事呢？唔通曾蔭權又被揭發令人眼火爆嘅貪腐醜聞？貪曾舔盡大小便宜固然係事實，否則都唔會淪為鵝頸橋打小人嘅目標對象，不過功夫茶今日暫時唔得閒招呼「香港第一貪官」，必須集中火力對付另一班小人。
小人嘅所作所為係咁嘅，近年於網上不斷發放誹謗東方報業集團嘅貼文，內容惡意中傷，部分文章甚至誣衊東方涉及嚴重刑事罪行，簡直煩不勝煩。誹謗文章超過八百篇，網站遍布中國大陸、美國、香港、台灣等十幾個國家及地區。鵝頸橋神婆打小人用嘅係拖鞋，東方還以顏色出手打小人當然唔會咁兒戲，而係實牙實齒懸賞厚酬，追緝不斷網上誹謗嘅幕後黑手！
呢嗱嗱嗱，東方已經成功揪出一批惡意中傷嘅高登網民。以網名「一時俊傑」、「徐晃」同「去支」貼文嘅寶萬隆實業公司、徐偉倫以及葉建紅，分別於○七至○八年間發表詆毀文章，呢批小人喺《東方日報》、《太陽報》同on.cc刊登道歉啟事，其中「一時俊傑」更加就誹謗行為向東方賠償。另外，東方正在透過法律程序揪出其他多個涉嫌誹謗嘅網民，即使追討費用不菲，東方仍然絕不放棄，誓要誹謗者付出沉重代價！所以話啫，犯東方者，雖難必誅，雖遠亦必誅！
以前毛澤東曾經講過，東風吹，戰鼓擂，現在世界上究竟誰怕誰？得道多助，失道寡助。歷史規律不可抗拒，不可抗拒！
家陣計功夫茶話齋，老毛講得啱，正義力量不可抗拒，不可抗拒！
港區全國政協委員劉夢熊講得冇錯，中央政府有強大嘅網絡監察，堪稱滴水不漏，絕不應該容許誹謗言論網上散布，東方作為正義傳媒，應該得到保護。劉夢熊促請內地當局唔好再歎慢板，必須責令各省市執法。
劉夢熊委員仲話，誹謗貼文多年來陰魂不散，猶如病毒不斷散播，幕後黑手不排除係生意上嘅競爭對手：「唔夠人嚟就靠打擊人哋抬高自己，真係好唔要得！」
其實講堅吖，正義傳媒冇有怕，理得你幕後黑手係邊一隻牛鬼蛇神，戰鼓一旦擂響就要打一場勝仗。成功打倒一批小人只係開始，正所謂重賞之下必有勇夫，厚酬通緝一定會將牛鬼蛇神繩之以法！
功夫茶不妨以屈機口脗向幕後黑手講一句，唔識死就繼續惡意中傷，明又好，暗又好，東方必定奉陪到底，打小人從來唔會手軟！