政情：股壇長毛點歌句句應景
特首候選人唐英年前日第三度擺老婆上枱，要太太郭妤淺上電台為佢嘅私生子女醜聞擋箭，連一向較少談論政治、外號「股壇長毛」嘅David Webb都睇唔過眼，趁尋日三八婦女節，透過佢向班財經界朋友發出嘅電郵，點咗首歌畀唐太聽，相當應景。
首歌就係Tammy Wynette嘅《Stand by Your Man》（支持你的男人），歌詞論盡女人之苦，提到「當自己個男人開心嘅時候，就係你唔開心嘅時候」，又話「男人就係男人」，總會「做出一啲你唔理解嘅事」，「但如果你真係愛佢，就會原諒佢」！
唐唐於財經界流失支持
David Webb早前喺財經界進行民調，顯示唐唐嘅支持率有近三成七，低過對手梁振英（CY）嘅四成一。佢尋日更新有關民調，發現CY嘅支持率已升至四成三，唐唐就跌到得番三成半，差距愈拉愈遠。連一向支持開唐唐嘅財經界都離棄佢，真係擔心唐太唔知可以點樣撐落去喇。