貪盡海陸空嘅煲呔曾被揭發以每年一百萬元「超筍價」，承租富商黃楚標位於深圳東海花園嘅複式豪宅單位。煲呔曾認衰退租後，傳媒人蕭若元見個單位裝修豪華，租金又咁「實惠」，即時向黃楚標表達想承租個單位，點知換來黃楚標一句「玩嘢」，搞到蕭若元極之唔忿氣。
為表誠意，蕭若元拿拿聲委託律師行跟進，仲擺低三百萬元「誠意金」支票喺律師樓度，諗住用呢個「市值價」，預支單位嘅三年租金。律師行仲即刻發信畀黃楚標，諗住盡快傾吓承租單位嘅事，仲講到明會等到煲呔曾嘅舊租約搞掂後先至承租，點知黃楚標遲遲都無回覆，真係無私顯見私喎。
蕭若元話，可能黃認為任何人提出同煲呔曾同樣嘅條件去租個單位都係「玩嘢」，因為一百萬元根本非市價，佢亦唔係特首，畀唔到咩好處。蕭若元希望黃楚標向公眾解釋清楚，否則只會加深市民對涉嫌利益輸送嘅印象喎。