尋日係三八婦女節，又係不甘寂寞嘅「民主阿婆」陳方安生出動嘅時候喇！尋日佢出席一個活動時被問及煲呔曾嘅連串貪腐濫權醜聞，陳太口口聲聲話自己唔想評論特首，但同時強調廉潔奉公一向都係公務員嘅核心價值，呢個傳統十分值得保留同埋鞏固，而作為領導層就更加需要以身作則，變相暗批煲呔曾其身不正。
不過講開又講，陳太做官時亦曾經爆出接受銀行十成按揭厚待嘅醜聞，性質唔好得過「曾貪心」醜聞好多，五十步笑百步，抽水變自抽。
講到特首選舉，民主阿婆即刻上晒身，話近日有關特首候選人嘅黑材料新聞，正好披露小圈子選舉嘅弊端，至於選委應唔應該投白票，佢就直認自己冇票，但如果選委真係揀唔落手，都好難怪佢哋會投白票。
講番婦女問題，陳太慨嘆六十年代佢剛加入政府時，女同事結婚之後要先辭職再申請入職，份合約仲分分鐘會由長約變成臨時約，佢又自爆曾經遇過一個麻煩男上司，至於係邊個？佢就只肯講係回歸前嘅事。