政情：曾濠食之謎 追究到底
東方報業集團獨家撕破「曾貪心」假廉潔面具，市民無不睇到怒火中燒。雖然曾貪心敵不過滔天民怨，以唧牙膏方式交代佢嘅貪婪實況，不過大家絕對唔能夠就此收貨，事關曾貪心披露咗嘅，只係佢幾年來坐富豪私人遊艇或者私人飛機嘅交通費，而期間佢喺澳門或者泰國布吉嘅食宿費用，至今仍然係個謎，市民同身為代議士嘅立法會議員，絕不能就此罷休。
自上月下旬東方報業集團揭破曾貪心醜聞開始，我哋已經鍥而不捨，要求曾貪心交代佢「豪華遊」嘅食宿、交通等開支點計，不過佢都係選擇性作答，只答交通費，答啲唔答啲。點解？因為佢都唔知點答。
曾貪心鑽盡空子貪盡海陸空，自創接受外訪嘅守則，就係交通費畀市價，連公務員事務局嘅意見都唔去諮詢，所以五百蚊兩公婆搭豪華遊艇由澳門返港。不過佢自創嘅只係交通費嘅準則，可能佢自己都覺得太牽強啦，住宿同飯餐佢都費事自創一套計法。所以問佢外遊食宿點計，佢計來計去，都答不出個所以然。
數度住私人遊艇亦可疑
喺住嗰方面，曾貪心幾次外遊，今年二月同舊年四月佢兩公婆去澳門住喺私人遊艇，舊年去泰國布吉又係住喺私人遊艇，單單畀渡輪票價就有得搭私人遊艇兼住埋喺隻遊艇度？邊有可能咁筍呀？根據佢跟市價付費嘅準則，兩公婆畀番五百蚊一晚囉。
講到食，佢就更加唔敢計。根據《東方日報》同《太陽報》嘅報道，佢去到澳門嘅時候歎盡兩頭鮑、鵝肝、靚牛扒，仲有十萬蚊一支嘅紅酒，就算佢唔承認，我哋嘅可靠消息話，佢哋一行十人去咗澳門凱旋門酒店嘅高級上海菜館食咗一餐，嗰餐盛惠二萬七千蚊，菜式有魚翅鮑魚龍躉，點計呢？唔通佢又自定規則，畀番一百蚊？真係愈講愈荒謬。
所謂事無不可對人言，免費食宿都係屬於款待嘅一種，點解佢只係肯交代交通費，對食住開支避而不談？我哋作為第四權力一定會追究到底，但立法會班議員唔好以為出動特權法不成、彈劾又唔得就可以怠慢，否則市民同選民都會看在眼裏架！