中環出更：邱子傑眼鏡生意唔憂做
行高檔路線眼鏡嘅溥儀眼鏡店老闆邱子傑（Jeffrey），向來甚少戴眼鏡出席公開場合，莫非佢擁有鷹眼咁良好嘅視力？答案恰恰相反，Jeffrey係一個大近視。原來Jeffery自細就有近視，學生時代同眼鏡結下不解緣，隨着年齡增長，佢嘅近視度數早已突破一千度大關，但佢覺得自己唔適合做激光矯視，所以一直只戴隱形眼鏡。
激光矯視有限制
至於激光矯視會否因此減少眼鏡生意？Jeffrey就話唔擔心，因為呢種手術並非人人都做得，例如近視太深嘅人就唔適合，況且激光矯視唔會將近視完全消除，所以眼鏡店仍然有客路喎。佢又話，內地消費者講求高品味，所以高檔嘅眼鏡產品好搶手，加上佢又留意到好多年輕人只戴眼鏡框架，意味眼鏡好似時裝咁講求潮流嘅觀念，已經被年輕一代受落，所以眼鏡業真係唔憂做。
為咗緊貼眼鏡業界嘅動向，Jeffrey話稍後會飛去米蘭出席眼鏡展覽會，吸收吓最新嘅潮流資訊咁話。
卓妮