中環出更：名媛教唐唐認錯保誠信
好多婦女團體都趁住尋日三八婦女節搞活動慶祝，今年嘅話題都圍繞住同一樣嘢，就係特首候選人唐英年嘅婚外情同私生子傳聞，加上唐太郭妤淺前日又被老公擺上台，好多人都戥佢唔抵。婦女事務委員會前主席高靜芝（Sophia）喺一個婦女研討會上話，覺得唐太好偉大，為咗大局而犧牲自己，坦言對唐太嘅印象加分，但對唐唐形象同選情就毫無幫助喇。
Sophia話，作為特首候選人，應該喺參選前就要考慮清楚自己係咪適合參選，如果自覺真係有做過錯事，就應該坦誠公開，否則誠信就會受到質疑。
身在北京嘅政協委員兼特首選委汪明荃都話好關注事件，佢直言或多或少都影響佢嘅投票取向。汪阿姐話，雖然事件屬於唐唐嘅家事，但認為特首候選人嘅操守最重要，因為特首代表香港，必須有一定嘅信譽。
同樣身在北京嘅政協委員蔣麗芸（Ann）就表示，祝願天下所有已婚男人都珍惜家庭，千祈唔好行差踏錯，而有心從政嘅男人就更要加倍警惕喎。
白韻琹：唐太道歉太遲
至於「訴心聲」經驗豐富嘅白韻琹，尋日反而批評唐太就僭建風波道歉太遲，表現失敗，既然決心認錯，就應該儘快，否則令人覺得佢想做特首夫人，才千方百計護夫。
卓妮