廢置單車 民政署拒清理
天水圍天耀邨對出行人路滿布廢置單車，民政事務總署卻未作處理！「啲單車爆晒胎漏晒氣，仲畀人擺晒牌賣廣告，好明顯就係廢車，但係一直都冇人清理過！」林先生直言有關單車已被棄置多年，縱使偶爾得悉區內有清理行動，亦只聞樓梯響，棄置單車依然安在。
民政署發言人指出，當局一向關注單車違例停泊問題，會按需要聯同食物環境衞生署及警方就違泊黑點展開聯合清理行動；去年在元朗區共進行三十五次行動，清理超過一千部單車，而有關地點亦曾於去年十月展開清理行動，接獲本報轉介後亦會再作清理。
不過，當區區議員梁志祥直指當局清理單車的態度有欠積極，令廢置單車問題日趨嚴重，「佢哋話就話個個月都會做聯合行動，但係次次地點都唔同，其實每個地方都要半年至一年先有人清理！」梁要求當局增加清理密度，以收阻嚇作用。